RC TABORA AAGIZA UPANDAJI WA MITI YA MATUNDA MASHULENI

Posted on: October 24th, 2021

MKUU wa Mkoa wa Tabora Balozi Dkt.Batilda Buriani ameagiza kila shule ihakikishe imepanda miti ya matunda katika maeneo yao.

Hatua hiyo inalenga kuongeza wingi wa matumizi ya matunda kwa ajili ya wanafunzi wawapo shuleni na kukamilisha mzunguko wa lishe bora.

Balozi Dkt. Batilda ametoa kauli hiyo leo wakati wa uzinduzi wa maadhimisho ya wiki ya lishe ambayo Kitaifa yanafanyika Mkoani Tabora chini ya kauli mbiu Lishe bora ni kinga thabiti ya magonjwa kula mlo kamili fanya mazoezi kwa bidii  kazi iendelee.

Balozi Dkt. Batilda alisema hata kauli mbiu ya mwaka huu inasisitiza ulaji wa mlo kamili hauwezi kukamilika bila kuwepo kwa tunda katika chakula.

Aliwataka Wakurugenzi Watendaji wa Halmashauri zote Mkoani kuhakikisha wanawahimiza wananchi wakiwemo wanafunzi kupanda miti ya matunda ya aina mbalimbali katika maeneo yao.

Balozi Dkt. Batilda alisema hatua hiyo itaongeza upatikanaji wa matunda kwa ajili ya wao kula na yale ya ziada watauza na kujiatia fedha kwa ajili shughuli zao za maendeleo.

Aidha Mkuu huyo wa Mkoa aliwataka Watendaji katika Taasisi ya Utafiti wa Kilimo Tanzania (TARI Tumbi) kuhakikisha inasambaza teknolojia ya upandaji wa miti ya matunda na ile ya dawa asili ili isitoweke.

Alisema baadhi ya matunda pori yanafaida nyingi mwili ikiwemo kutumika kama tiba na kinga mwilini.

Katika hatua nyingine Balozi Dkt. Batilda aliwataka wakazi wa Tabora na wageni waliopo katika maadhimisho hayo kutembelea eneo maalumu la mapishi ya vyakula vya asili  kwa ajili ya kujifunza mapishi mbalimbali.

Alisema vyakula hivyo ni muhimu kwa kulinda afya kwa kuwa vinatumia viungo vya asili kama vile karanga na havitumii mafuta mengi.

Mkuu huyo wa Mkoa alisema kilele cha maadhimisho ya wiki ya lishe kitafanyika Jumamosi ya wiki hii ambao Mgeni rasmi atakuwa Waziri wa Afya  Maendeleo ya Jamii  Jinsia  Wazee na Watoto Dkt Dorothy Gwajima.

Mkuu wa Wilaya ya Tabora Dkt. Yahya Nawanda alisema kwa kuwa Mwezi ujao wanaanza zoezi la kutoa chakula mashuleni atakwenda usimamia zoezi la upandaji wa matunda  ili wanafunzi wanaokula chakula mchana wapate na matunda kwa ajili ya kukamilisha mlo kamili.

Wakati huo huo Wakuu wa Wilaya wamesaini Mkataba wa utekelezaji wa masuala ya lishe na Mkuu wa Mkoa wa Tabora ili waweze kusimamia vizuri masuala ya lishe.

Akizungumza baada ya kuwasainisha mikataba hiyo , Mkuu wa Mkoa wa Tabora Balozi Dkt.Batilda aliwataka kuhakikisha masuala ya kuhamasisha  lishe ni ajenda ya kudumu.

Alisema Rais wa Jamhuri ya Muungano wa Tanzania Mhe. Samia Suluhu Hassan alitambua umuhimu lishe na ndio maana akasisi na kusisitiza masuala ya lishe hapa nchini wakati akiwa Makamu wa Rais.

Balozi Dkt. Batilda alisema Rais Samia alitambua kuwa kupitia lishe bora Watoto wanaozaliwa wanakuwa na king ana afya bora